260 դիտում

ԱՄՆ-ում ներկայումս ընթանում է ցիկլոսպորոզ (cyclosporiasis) աղիքային մակաբուծային վարակի խոշոր բռնկում, որն արդեն տարածվել է 34 նահանգներում: ԱՄՆ Հիվանդությունների վերահսկման և կանխարգելման կենտրոնը հաստատել է 1645 լաբորատոր հաստատված դեպք, ևս ավելի քան 5100 հավանական դեպք գտնվում է հետազոտման փուլում: Վարակի փոխանցման հավանական գործոնը կապված է Taco Bell արագ սննդի ռեստորանների ցանցում մատուցվող՝ Մեքսիկայից ներկրված կտրատված այսբերգ հազարի հետ: FDA-ն արդեն նշել է, որ ընկերությունը դադարեցրել է տվյալ մատակարարի արտադրանքի օգտագործումը: Բռնկման էպիկենտրոնը ԱՄՆ-ի Միջին Արևմուտքն է: Ամենաբարդ իրավիճակը Միչիգան (ավելի քան 3300 դեպք) և Օհայո նահանգներում է: Ազդեցության գոտում են նաև Կենտուկին, Ինդիանան և Արևմտյան Վիրջինիան: Այս պահին արձանագրվել է 141 հոսպիտալացում, մահվան դեպքեր չեն գրանցվել:
Ի՞նչ է ցիկլոսպորոզը և որոնք են ախտանիշները

Հիվանդությունը հարուցվում է Cyclospora cayetanensis մակաբույծով, որը մարդու օրգանիզմ է ներթափանցում ֆեկալ-օռալ մեխանիզմով, առավելապես կղանքով բաղարկված սննդի (հիմնականում հում մրգերի, բանջարեղենի) կամ ջրի միջոցով: Հիմնական ախտանշաններն են.
• Ջրիկ և հաճախակի («պայթյունավտանգ») փորլուծություն
• Որովայնի փքվածություն, գազեր և ցավեր
• Ախորժակի անկում և քաշի կորուստ
• Սրտխառնոց և ուժեղ հոգնածության զգացում

Ի տարբերություն այլ սննդային գործոնով պայմանավորված աղիքային վարակների (օրինակ՝ սալմոնելայի), որոնք կարող են անցնել մի քանի օրում, ցիկլոսպորոզի ախտանիշները կարող են տևել շաբաթներ կամ նույնիսկ ամիսներ, եթե հիվանդը յուրահատուկ հակամակաբուծային բուժում չստանա:

ԱՄՆ Հիվանդությունների վերահսկման և կանխարգելման կենտրոնը կանխարգելման նպատակով խորհուրդ է տալիս`
1. Խուսափել ռիսկային սննդից. Խորհուրդ է տրվում չօգտագործել Taco Bell-ի հազար պարունակող ուտեստները նշված նահանգներում:
2. Լվանալ մթերքը. Մրգերն ու բանջարեղենը մանրակրկիտ լվանալ հոսող ջրի տակ (թեև մակաբույծը երբեմն դժվար է հեռացվում միայն լվանալով):
3. Դիմել բժշկի. Եթե ԱՄՆ-ում եք և ունեք երկարատև փորլուծություն, անհրաժեշտ է դիմել բժշկի և խնդրել հենց Cyclospora-ի թեստ, քանի որ սովորական լաբորատոր քննությունները հաճախ այն բաց են թողնում: